GENERAL SANTOS CITY – Arestado ang usa ka amahan human gitigbas ang duha ka anak gumikan lamang sa usa ka galon sa tuba.
Giila ang suspek nga si Danny Malveno, 55-anyos, residente sa Prk Maunlad, Silway 8, Polomolok, South Cotabato.
Samtang ang mga biktima mao silang Herbolingo, 22 anyos ug Daryll Malveno, 26-anyos.
Gikabutyag nga alas-6:00 Martes sa gabii, magkauban nga nag-inom ang mag-amahan. Dihang nahurot na ang ilang tuba, nangayo matud pa ang suspek ug dugang usa ka galon, apan gibalibaran na sa mga anak.
Nasuko matud pa ang suspek ug gipangtigbas ang mga anak.
Nakaangkon ug samad-tinigbasan sa ulo si Herbolingo, samtang sa kamot kang Daryll. Apan hugtanong gipanghimakak sa suspek ang akusasyon, ug gibutyag nga gisaway lamang niya ang mga anak nga muundang na sa pag-inom apan wala matud pa mituo ang mga nasampit hinungdan nga iyang nahimo ang pagtigbas sa mga anak.
Gihingusgan usab niini nga wala siyay plano nga patyon ang mga anak. Bisan paman, desidido ang mga biktima nga kasuhan ang ilang amahan, hilabi pa nga nahimo na matud pa kining problema sa ilang lugar gumikan matag adlaw kining gahubog ug gamaoy.
Sa pagkakaron nagpabiling balhug sa Polomolok Municipal Police Station ang suspek.
