Lauman nga mas daghan ang makapalit ug bugas sa presyo nga P29 matag kilo tungod ibaligya kini sa dugang nga Kadiwa stores sa Byernes dungan sa official rollout sa “Bigas 29” program sa Department of Agriculture (DA).
Matud ni Assistant Secretary ug spokesman Arnel de Mesa, ianunsyo sa Huwebes ang dugang nga kalamboan kun adunay mga pagbag-o sa maong programa.
Una na nga gi-anunsyo ni Agriculture Secretary Francisco Tiu Laurel Jr. nga giaprubahan na sa National Food Authority Council nga ibaligya ang daan apan maayo pa nga stocks sa NFA rice sa tag-P29 matag kilo pinaagi sa Kadiwa stores.
Apan giklaro ni De Mesa nga ang P29 matag kilo sa bugas nga ibaligya sa Kadiwa stores ang dili lamang maggagikan sa imbentaryo sa NFA.
Ang maong programa alang sa vulnerable sectors nga nagalakip sa persons with disabilities, solo parents, senior citizens ug indigenous peoples.
