GENSAN- Gipadayag ni CDRRMO Officer Dr. Bong Dacera Jr. ang kahinungdanon sa pagsunod sa “Duck, Cover and Hold” panahon sa linog, bisan unsa pa ang kakusog sa pag-uyog sa yuta.
Matud ni Dacera, base sa datos, mas dako ang posibilidad nga masamdan ang mga tawo nga maningkamot og dagan panahon sa linog kumpara sa mga nagpabilin sa ilang dapit ug misunod sa hustong safety procedure.
Gipasabot niya nga bisan sa intensity 6 nga linog, mahimong lisod na ang pagtindog, busa mas delikado ang pagdagan kon mas kusog pa ang pag-uyog.
Ilabi na sa mga eskwelahan, matud ni Dacera, mahimong mas dako ang risgo sa disgrasya kung magdungan og gawas ang gatusan ka estudyante samtang nag-uyog pa ang yuta.
Human sa pag-uyog, iyang girekomendar nga hapsay ug organisado ang paggawas sa mga estudyante padulong sa gitakdang evacuation area ug dili magdali aron malikayan ang dugang nga kadaot.
