Gihatagan sa Department of Trade and Industry (DTI) ang mga online seller hangtod sa katapusan sa Setyembre 2025 nga magparehistro ug ipa-inspeksyon ang ilang mga produkto alang sa E-Commerce Philippine Trustmark, usa ka sertipikasyon nga nagsiguro sa kaluwasan ug kalidad sa mga produkto nga gibaligya online.
Matod ni Trade Secretary Maria Cristina Roque, ang Trustmark nagtumong sa pag-giya sa mga konsumidor kung unsang mga produkto ang adunay maayo nga kalidad ug nakapasar sa safety checks sa DTI, subay sa Consumer Act of the Philippines.
Gibutyag usab ni Roque nga nakig-alayon na ang DTI sa mga e-commerce platforms aron dasigon ang mga online sellers nga magparehistro, ilabi na nga nakadawat ang ahensya og reklamo bahin sa substandard nga mga produkto nga giingong gihimo pinaagi sa online selling.
Ang Trustmark nagtumong usab sa pagsiguro sa kaluwasan sa mga konsumedor atubangan sa nagkalapad nga industriya sa e-commerce sa nasud.
