Gipahibalo ni Department of Social Welfare and Development o DSWD Secretary Rex Gatchalian nga hinay-hinay nang gipalapdan sa ahensya ang paggamit sa digital channels sa pag-apod-apod sa ayuda, apan nagpabiling hagit ang kakulang sa bank account sa daghang benepisyaryo.
Matud ni Gatchalian, fully digital na ang payout sa Walang Gutom Program ug 4Ps, samtang gipadayon pa ang digitization sa pipila ka social protection programs sama sa Assistance to Individuals in Crisis Situation o AICS, lakip na ang Unified Package for Livelihoods, Industry, Food, and Transport o UPLIFT.
Sa UPLIFT, giingon sa kalihim nga tumong niini nga mahimong digital ang payout alang sa 2.5 milyong benepisyaryo.
Apan base sa ilang gihimong validation, 20 porsyento lamang sa mga benepisyaryo ang adunay bank account.
Tungod niini, nakigtambayayong ang ahensya sa Bangko Sentral ng Pilipinas o BSP aron ma-enroll ang mas daghang benepisyaryo sa mga bank account ug aron hinay-hinay nga mapatuman ang digital distribution sa ayuda.
Samtang, sumala kang Bulacan 6th District Representative Salvador Pleyto, importante nga tagdon ang mga benepisyaryong walay bank account, smartphone o internet aron dili sila mapagawas o mapag-iwanan sa pagbalhin ngadto sa digital payout system.
