GENSAN – Mipadayag si Atty. Luis Salazar nga dili gayud angay balewalaon ang prinsipyo sa command responsibility kalabot sa mga anomalya nga nalambigit sa mga flood control project.
Matod pa niya, importante nga klarohon kon kinsa ang tinuod nga adunay katungdanan sa pagdumala ug pagbantay sa proyekto, ilabi na kon kini naggamit og dakong pondo gikan sa kaban sa gobyerno.
Gipatin-aw ni Salazar nga ang command responsibility nagpasabot nga ang usa ka opisyal mahimong manubag dili lang sa iyang kaugalingong aksyon apan apil usab sa mga sala ug kakulangan sa iyang mga kaubang opisyal nga anaa sa iyang otoridad ug responsibilidad.
Busa kon adunay kalapasan o anomalya nga mahitabo, kinahanglan nga aduna gihapon silay manubag sa taas nga pwesto.
Gibutyag ni Atty. Salazar nga si DPWH Secretary Manuel Bonoan mao ang adunay command responsibility sa mga flood control projects anomaly ug tungod niini angayan na kini nga mobiya sa iyang pwesto.
