Gipaniguro sa Department of Social Welfare and Development nga padayon ang ilang paghatag og hinabang sa tanang benepisyaryo sa Pantawid Pamilyang Pilipino Program o 4Ps.
Kalabot niini, malampusong nihatud ang ahensya sa “Work in the New Philippines for 4Ps” Job Fair sa San Fernando City sa Pampanga .
Moabot sa 3,000 ka benepisyaryo sa nasangpit nga programa ang misalmot sa Job Fair.
Sa usa ka pamahayag, ang Department of Social Welfare and Development niingon nga moabot sa 21 ka mga pribadong amo ang mitanyag og trabaho sa mga partisipante.
Matod ni DSWD Undersecretary Vilma Cabrera sa Conditional Cash Transfer Group, kini nga inisyatiba kabahin sa paningkamot sa administrasyong Marcos Jr. aron mahatagan ug disenteng trabaho ang tanang Pilipino.
Makatabang usab kini sa pagsiguro nga ang mga benepisyaryo sa 4Ps adunay access sa trabaho ug sa katapusan makakab-ot sa kaugalingon nga katagbawan.
Ang DSWD nakigtambayayong sa ubang dagkong ahensya sa gobyerno sa pagpahigayon sa Job Fair. Sumala sa datos nga gipagawas sa ahensya, moabot sa 135 ka partisipante ang gi-hire on the spot.
Mahimong makadawat og 5,000 alang sa ilang pre-employment ang madawat sa trabaho, depende sa assessment sa DSWD.
