Magsugod na ang Department of Social Welfare and Development (DSWD) sa pagpatuman sa Emergency Cash Transfer (ECT) program alang sa mga pamilyang naapektuhan sa magnitude 7.8 nga linog nga miigo sa Sarangani ug mga kasikbit nga lugar niadtong Hunyo 8.
Sumala sa DSWD, sugdan ang pag-apod-apod sa cash assistance karong Martes, Hunyo 23, sa mga apektadong komunidad sa Davao Occidental, Sarangani, ug General Santos City.
Lakip sa mga makadawat sa ayuda ang mga pamilya gikan sa mga lungsod sa Glan ug Malapatan sa Sarangani, General Santos City, ingon man sa Balut Island ug Jose Abad Santos sa Davao Occidental.
Matud sa ahensya, kabahin kini sa ilang early recovery program nga nagtumong sa pagtabang sa mga pamilya aron makabangon gikan sa kalamidad, makaayo sa ilang naguba nga mga panimalay, ug makapalit sa ilang mga batakang panginahanglanon.
Gipasabot sa DSWD nga nahatag na sa unang mga adlaw human sa linog ang mga food packs ug non-food items, busa cash assistance na ang sunod nga lakang alang sa recovery phase sa mga biktima.
Base sa datos sa ahensya, mikabat na sa kapin 84,000 ka mga balay ang naitalang partially damaged ug totally damaged tungod sa kusog nga linog.
Gibanabana usab nga kapin sa 139,000 ka pamilya gikan sa Region 11 ug Region 12 ang makabenepisyo sa programa, nga adunay kinatibuk-ang pondo nga molapas sa P799 milyon.
