Gipasiguro ni Department of Social Welfare and Development Secretary Rex Gatchalian ang kaandam sa ahensya sa pag-atubang sa posibleng epekto sa nagkaduol nga El Niño.
Kini human sa una nga pahibalo sa state weather bureau nga adunay 79% nga tsansa nga mobalik ang El Niño gikan Hunyo hangtod Agosto 2026.
Matod ni Gatchalian, adunay total nga 4.7 milyon ka national stockpile sa Family Food Packs ang DSWD nga magamit isip tabang sa El Niño ug uban pang kalamidad sa nasod.
Iyang giingon nga kini na ang pinakadakong stockpile nga natala sa kasaysayan sa ahensya sa tibuok Pilipinas.
Kabahin kini sa direktiba ni Pangulong Ferdinand “Bongbong” Marcos Jr. nga paspason ang aksyon sa gobyerno sa matag emerhensya.
Dugang pa niya, dili na maghulat ang DSWD sa pag-abot sa kalamidad kondili adlaw-adlaw nang nag-andam ug nag-preposition sa mga suplay sa mga delikadong lugar sa nasod.
