Gihimakak ni Department of Social Welfare and Development (DSWD) Secretary Rex Gatchalian ang akusasyon ni Bise Presidente Sara Duterte sa paggamit sa 2 ka mga programa sa ahensiya alang sa pagpamalit og boto.
Matod sa kalihim, nagpadayon ang pagproseso sa mga aplikasyon ug pag-apod-apod sa mga hinabang pinaagi sa Assistance to Individual in Crisis Situation (AICS) ug Ayuda sa Kapos Ang Kita Program (AKAP) alang sa mga kwalipikadong benepisyaryo sa nasangpit nga mga programa.
Subling gipasabot sa opisyal nga ang tanang field offices sa DSWD sa tibuok Pilipinas nanghatag ug tabang sa mga tawo nga nanginahanglan, walk-in man sila o gi-refer sa mga opisyal sa lokal nga kagamhanan.
Ang kadagkoan sa DSWD mihimo niini nga pamahayag human si VP Sara miingon sa virtual press briefing karong Biyernes sa gabii nga ang pagpamalit og boto karong adlawa gitago kuno sa ngalan sa mga hinabang sama sa AICS, AKAP ug Tulong Panghanapbuhay sa Ating Disadvantaged/Displaced Workers (TUPAD). ang Department of Labor and Employment (DOLE).
