GENERAL SANTOS CITY – Nagbangutan karon ang pamilya sa usa ka lalake nga patay sa gipahigayong buy bust operation sa kapulisan sa Cannery Site, Polomolok, South Cotabato.
Matud ni P/Lt Col. Alex Joe Orcajada, hepe sa Polomolok Police Station nga ang napatay nga target suspect nga si Noel Bagco, hamtong ang pangidaron nga residente sa nasampit nga lugar.
Sa dihang gipahigayon ang operasyon nakamatikod ang suspek nga pulis ang katransaksyon hinungdan nga mibunot og revolver og gipabuto punting sa kapulisan apan naunhan sa pagpabuto.
Nakaangkon ug samad pinusilan sa lawas ang suspek hinungdan sa iyang kamatayon.
Una niini, napalitan og usa ka pakete sa gituohang shabu ang suspek samtang narekober sa kapulisan sa iyang posisyon ang lain pang plastic sachet sa droga, P2,250 cash, armas og uban pang gamit.
Gikabutyag nga dugay nang namonitor ang suspek nga nalambigit sa pagbaligya og iligal nga droga hinungdan gipahigayon ang operasyon.
