Nadiskubre sa mga awtoridad nga adunay kargang military ammunition ang Ukrainian cargo aircraft nga unang gikatahong adunay nakakabit nga military-grade explosives sa Leipzig/Halle Airport sa Germany.
Base sa usa ka confidential police report, nakit-an ang maong impormasyon atol sa imbestigasyon. Giingon usab sa mga report nga nakumpirma sa forensic experts nga ang pabuto nga nakakabit sa drone kay high military grade.
Sumala sa wala hinganli nga mga imbestigador, wala mopabuto ang drone tungod kay adunay teknikal nga depekto ang explosive device niini.
Tungod niini, gipakusog ang counterterrorism investigation sa Leipzig/Halle Airport, nga usa ka dakong cargo hub ug NATO military logistics center sa Germany ug giila nga kabahin sa critical infrastructure sa nasod.
Matud ni German Interior Minister Alexander Dobrindt, ang insidente mahimong matawag nga usa ka “hybrid attack” nga nagpakita sa nagkadakong hulga sa seguridad sa ilang nasod.
Nakatakda usab siya nga makigpulong sa mga opisyal gikan sa Baltic states, Poland, Sweden, Norway, Denmark, ug ubang mga nasod sa katapusan sa Agosto aron hisgutan ang pagpalig-on sa ilang depensa sa militar.
Padayon pa ang imbestigasyon sa mga awtoridad aron mahibal-an ang dugang detalye sa insidente. Gipangita pa usab ang mga debris sa usa ka wala pa mailhing butang nga miigo usab sa laing cargo aircraft.
Una nang gikataho nga ang drone nakit-an duol sa pipila ka Ukrainian Antonov An-124 cargo aircraft, nga lakip sa pinakadakong cargo planes sa kalibotan.
Nakita usab sa usa ka reporter sa Reuters ang mga pulis nga nagkuha og ebidensya duol sa usa sa mga eroplano.
Samtang, ang cargo aircraft nga naigo sa wala pa mailhing butang naghimo og go-around maneuver tungod kay sirado ang usa ka runway sa paliparan. Gamay ra ang kadaot niini ug luwas kining nakalanding sa Hanover, Germany.
Tungod sa maong insidente, temporaryong gisuspinde ang operasyon sa Leipzig/Halle Airport ug gibalhin ang pipila ka flight, lakip na ang mga eroplano sa DHL. Apan, sumala sa airport management, nibalik na sa normal ang operasyon.
Sa pagkakaron, wala pa mailhi ang suspek sa insidente.
