GENERAL SANTOS CITY– Padayon pang gipangita sa mga otoridad ang OIC manager sa KAPA Community Ministry International Inc o Kabus Padatuon sa Alabel nga kauban sa driver nga gipusil patay sa mga motorcycle riding criminals.
Missing matud pa ang nagpangalang Remely Jombitado Iral, 42 anyos nga OIC Manager sa Kabus Padatuon Alabel, kini human madala sa punerarya ang driver nga si Bresnev Morada, 38 anyos residente sa Agan Phase 1, Barangay San Isidro ning syudad.
Napatay sa pagpamusil si Morada samtang maneho ang usa ka pick-up raptor nga may plate number nga NDL 2796.
Base sa gipahigayong imbestigasyon sa kapulisan sa pagpanguna ni P/Major Alex Lanestosa, wala na makahawa sa drivers seat ang biktima human nga gipusil sa duha ka suspek.
Nakuha sa crimescene ang 7 basyo sa caliber 45 pistol og duha ka slug nga gituohang bala sa armalite rifle.
Nakuha usab sulod sa sakyanan ang usa ka shoulder bag nga adunay usa ka pitaka nga may cash nga P670.00 ug uban pang personal nga gamit.
Padayon pang gisuta sa mga otoridad ang motibo sa maong krimen.
Nasayran nga si Iral ang pag-umangkon sa asawa sa founder sa Kapa nga si Reyna Apolinario.
