GENERAL SANTOS CITY – Patay ang usa ka driver sa motorsiklo human ang maduguong aksidente sa national highway sa Prk San Francisco, Brgy Baluan ning siyudad kagahapong adlawa.
Sa pakighinabi sa Bombo Radyo, gibutyag ni PO2 Lemuel Aves sa Traffic Management Unit-GenSan nga natigayon ang insidente alas-2:30 sa hapon.
Sa imbestigasyon, managsama matud pang ginasubay sa Wigo nga maneho ni Robert Lumayag, taga-Prk Maharlika, Poblacion, Alabel, ug sa tricycle nga maneho ni Habidi Ibrahim, taga-Malapatan, ang national highway padulong sa direksyon sa Alabel, Sarangani.
Nabangga matud pa sa Wigo ang sidewheel sa tricycle hinungdan nga nawad-an ug kontrol ug naadto sa pikas lane ug mibangga usab sa kasugat nga motorsiklo nga maneho ni Marino Alikaway, taga-Malapatan.
Gumikan sa kakusog sa impact, nakaangkon ug grabeng injury sa ulo ang driver sa motorsiklo, nga nadala pa sa ospital apan nakabsan gihapon sa kinabuhi alas-3:30 sa hapon.
Samaron usab matud pa ang driver sa Wigo ug kasamtangang ginatambalan sa ospital.
Padayon pa ang ginahimong imbestigasyon sa TMU may kalabutan sa nahisgutang aksidente sa dalan.
