Nakatulog samtang nagmaneho og paspas usab ang padagan sa pick-up nga hinungdan sa disgrasya kagahapon sa buntag sa National Highway Brgy Calumpang ning syudad nga miresulta sa kamatayon sa usa ka indibidwal samtang tulo ang angol.
Matud kang P/Major Richard Ybañez sa Traffic Management Unit, ang pick up naglatas sa kadalanan ang mga sakyanan sa magsugat nga direksyon.
Ang pick up ang maneho ni Juvil Bruto Aton, 28 nga taga Phase 3 Malecido Homes, Barangay San Isidro kung asa paspas ang padagan niini sa sakyanan ug nakuratan na lang nga may nabanggaan na nga single motor nga maneho ni Nelson Lubrico 60 anyos taga Purok Bangsamoro, Lote Calumpang kung asa ang nasampit ang namatay gilayon og ang angkas niini nga anak nga si Giha Lubrico 24 anyos ang nalagpot.
Naangin usab sa disgrasya ang traysikel nga maneho ni Jonald San Recana, 27 nga taga Purok Kulasi Labangal kung asa nahimong pasahero niini si Cecilio Panandayan nga taga Poblacion Malapatan, ang duha ang pulos gidala sa ospital. Kustodiya sa Tambler Police station ang driver sa pick up nga si Aton.
Gibutyag ni Ybañez nga magpaabot lang sila sa mga reklamante kung magpasaka og kaso batok sa driver sa pick-up. Hinuon, gikabutyag nga nagpadayag si Aton nga abagahon ang tanang galastuhon sa mga biktima nga nadala sa ospital ingon man galastuhon sa pagpalubong sa namatay nga biktima.
