Nagpahinumdom ang Department of Labor and Employment (DOLE) ang tanang employeer sa saktong sweldo para sa regular ug espesyal nga non-working holidays karong bulan sa Abril.
Kini subay sa advisory sa ahensya para sa Huwebes Santo, Abril 2, Biyernes Santo, Abril 3, ug Araw ng Kagitingan sa Abril 9, nga tanan gideklarar nga regular holidays ingon man ang Sabado de Gloria o Black Saturday sa Abril 4, nga gideklarar nga special non-working holiday.
Gipasiugda sa DOLE nga ang mga employeer kinahanglan mosunod sa mga giya sa sweldo para sa regular holidays, diin ang mga empleyado nga motrabaho niining mga adlawa makadawat og doble nga sweldo sa unang walo ka oras, basta sila motrabaho o adunay leave of absence with pay sa adlaw sa dili pa ang regular holiday.
Ang mga empleyado nga dili motrabaho sa regular holiday mismo kwalipikado usab nga makadawat niini, basta sila motrabaho o adunay leave of absence with pay sa adlaw sa dili pa ang holiday.
Dugang nga 30% sa oras nga sweldo ang ibayad kung ang empleyado mo-overtime o mo-trabaho og sobra sa walo ka oras sa regular holiday.
Kon ang adlaw sa pagpahulay matunong sa regular nga holiday, dugang nga 30% sa basic wage ang ibayad isip double pay. Kon sobra sa walo ka oras ang trabaho sa adlaw sa pagpahulay mismo sa regular nga holiday, dugang nga 30% sa hourly wage ang ibayad.
Para sa special non-working holidays, ang “no work, no pay” ipatuman kon ang empleyado dili motrabaho sa maong adlaw, gawas kon adunay bag-ong polisiya sa kompanya o collective bargaining agreement nga naghatag og special pay.
Ang mga empleyado nga motrabaho sa maong adlaw makadawat og dugang nga 30% sa basic wage sa unang walo ka oras ug kon sobra sa walo ka oras ang trabaho, dugang nga 30% sa hourly wage ang ibayad.
Kon ang adlaw sa pagpahulay gikuha ug ang special non-working holiday matunong, dugang nga 50% sa basic wage ang ibayad sa unang walo ka oras nga trabaho samtang dugang nga 30% sa hourly wage ang madawat para sa overtime.
