Nipagawas ang Department of Labor and Employment og guidelines alang sa saktong suhulan atol sa holidays karong buwan sa Hunyo 2025.
Sa gipagawas nga Labor Advisroy 8 series of 2025, ang DOLE nihatag og gibug-aton nga ang payment pay rules kinahanglang sundon alang sa holidays sa Hunyo 6 isip pag-obserbar sa Eid’l Adha ug sa Hunyo 12 sa paghandom sa Independence Day nga gideklarar nga regular holidays base sa gipagawas nga Proclamation 911 sa Palasyo sa Malacañang.
Alang sa mga empleyado nga mahulog sa regular holiday, kinahanglan nga makadawat sila og doble nga suweldo o 200% sa batakang suholan sa unang walo ka oras.
Kung molapas sa walo ka oras o overtime sa usa ka regular holiday, ang empleyado kinahanglan makadawat og dugang nga 30% sa iyang inoras nga sweldo dugang sa doble nga suweldo.
Kung ang adlaw sa restday mahulog sa usa ka regular nga holiday, ang empleyado kinahanglan nga makadawat og dugang nga 30% sa batakang suholan dugang sa doble nga suweldo.
Kung ang empleyado molapas sa walo ka oras nga pagtrabaho ug mahulog sa adlaw sa pagpahulay, hatagan siya og dugang nga 30% sa iyang inoras nga sweldo.
Ang mga empleyado nga dili mahulog sa usa ka regular nga holiday makadawat og 100% sa ilang suhol, basta ang empleyado mo-report sa pagtrabaho o anaa sa leave of absence nga adunay suweldo sa adlaw sa wala pa ang regular holiday.
Kung ang adlaw sa dili pa ang regular holiday usa ka non-working day sa usa ka establisemento o ang gikatakdang rest day sa empleyado, makadawat gihapon ang empleyado og holiday pay kung siya nagtrabaho o nag leave of absence nga may suweldo sa adlaw sa wala pa ang non-working day o rest day.
