Nipagawas ang Department of Labor and Employment (DOLE) og guidelines alang sa tukmang pagbayad sa suholan sa mga trabahante sa pribadong sektor sa Labor Day, Mayo 1, nga gideklara nga regular holiday.
Sa gipagawas nga Labor Advisory No. 5 Series of 2025, gipasiugda sa DOLE nga ang mga empleyado nga nagtrabaho sa regular holiday angayan nga makadawat og double pay sa unang walo ka oras.
Alang sa overtime o trabaho nga lapas sa walo ka oras, ang mga empleyado kinahanglan makadawat og dugang nga 30% sa ilang inoras nga sweldo.
Kadtong wala motrabaho sa Mayo 1 angayan gihapon nga makadawat sa 100% sa ilang inadlaw nga sweldo, basta sila nagtrabaho o nagbakasyon nga adunay suweldo sa adlaw sa wala pa ang holiday.
Giklaro sa DOLE nga kung ang adlaw sa dili pa ang Mayo 1 usa ka rest day o non-working day, kinahanglang makadawat gihapon og holiday pay ang mga empleyado basta mo-report lang sila sa trabaho o anaa sa paid leave sa kataposang adlaw sa trabaho sa dili pa ang holiday.
Gipahinumdoman usab sa DOLE nga ang mga empleyado nga adunay rest day sa Mayo 1 ug mo-report pa sa trabaho angayan nga makadawat og dugang 30% sa ilang batakang suholan sa unang walo ka oras ug dugang 30% sa ilang inoras nga sweldo alang sa overtime nga trabaho.
