Nagpagawas ang Department of Labor and Employment (DOLE) og guidelines alang sa saktong suholan atol sa holidays sa Agosto 21 o Ninoy Aquino Day ug Agosto 25 o National Heroes Day.
Matod ni Labor Sec. Bienvenido Laguesma, gideklara ni Presidente Ferdinand Marcos Jr. ang Agosto 21 isip special non-working holiday samtang ang Agosto 25 isip regular holiday pinaagi sa Proclamation No. 727.
Sa gipagawas nga guidelines sa ahensya, ang mga empleyado sa pribadong sektor nga mosulod sa special non-working holiday karong Agosto 21 kinahanglan makadawat ug dugang 30% sa ilang inadlaw nga suholan dugang sa batakang suholan sa unang walo ka oras.
Kung mag-overtime, ang mga empleyado kinahanglan makadawat og 30% sa ilang inoras nga sweldo. Kung nagtrabaho sa adlaw sa pagpahulay, kinahanglan nga makadawat sila og dugang nga 50% sa 200% nga rate sa holiday ug kung magtrabaho sa overtime, adunay dugang nga 30% sa matag oras nga sweldo.
Ipatuman usab ang “No work, no pay” gawas lang kung adunay polisiya o collective bargaining agreement ang kompanya.
Samtang, alang sa regular holiday sa Agosto 25, ang mga empleyado kinahanglang makadawat og double pay sa unang walo ka oras ug kon sila mo-overtime, makadawat sila og dugang 30% sa matag oras nga suholan.
Kung rest day ug nagtrabaho ang empleyado, kinahanglan nga suholan sila og dugang 30% sa basic wage dugang sa double pay ug kon mag-overtime, dunay dugang 30% sa hourly nga sweldo.
Ang mga empleyado nga dili motrabaho sa regular holiday makadawat gihapon og 100% sa batakang suholan, basta mo-report sila sa pagtrabaho usa ka adlaw sa dili pa ang holiday.
