Nagpagawas ang Department of Labor and Employment o DOLE og mga safety protocol nga ipatuman sa mga pribadong kompanya aron mapanalipdan ang mga empleyado batok sa mga peligro nga dala sa dili maayong kalidad sa hangin.
Sumala sa Labor Advisory 15, ang mga employer kinahanglan nga magpatuman og Hazard Identification, Risk Assessment and Control o HIRAC aron mahibal-an ang lebel sa pagkaladlad sa mga trabahante sa aso, haze ug uban pang ‘air pollutants’ nga mahimong makaapekto sa ilang panglawas.
Girekomenda sa DOLE ang paggamit sa Air Quality Index Matrix and Action Points nga gipagawas sa Department of Environment and Natural Resources o DENR ug Department of Health o DOH.
Kung makasinati og dili maayong kalidad sa hangin, giawhag sa DOLE ang mga employer nga magpatuman og ,flexible work arrangements.’
Ang mga empleyado nga gikinahanglang mosulod sa trabaho kinahanglang magsul-ob og angay nga ‘protective equipment’.
Sa panahon usab sa emerhensya, gitambagan sa DOLE ang mga employer nga suspindihon ang trabaho.
Gikahinumdoman nga nakasinati og dili maayong kalidad sa hangin ang Metro Manila nga gituohang gikan sa Indonesia ang aso ug haze tungod sa mga wildfire.
