Gibutyag ni Department of Justice (DOJ) Secretary Jesus Crispin Remulla nga adunay tulo ka mga flood control projects nga gidokumento sa National Bureau of Investigation (NBI) nga adunay anomaliya.
Sa usa ka pamahayag, ang kalihim niingon nga kabahin kini sa report nga gihatag kaniya sa NBI, human ang nasampit nga buhatan gipalihok sa paghimo og kaugalingong imbestigasyon sa flood control crisis.
Bisan pa nga wala pa gidetalye sa kalihim ang kinatibuk-ang sukod sa imbestigasyon sa mga dokumentado nga anomaliya sa nahisgutang mga proyekto, iyang gipasabot nga adunay panagkunsabo ang pipila ka mga opisyal sa maong mga proyekto.
Wala usab maghisgot ang kalihim kung kinsa ang mga opisyal nga nalambigit, apan iyang gipasalig nga dili sila malambigit sa tibuok imbestigasyon, hangtod sa pagpasaka og mga kaso.
Gipasalig usab sa kalihim nga bisan og dako ang posibilidad nga adunay mga opisyal gikan sa legislative ug executive branch nga posibleng malambigit sa mga anomalosong proyekto, ang DOJ mopagawas sa kinatibuk-ang sukod sa imbestigasyon, hangtod sa pagpasaka og kaso batok sa mga responsable.
Gisugdan na sa NBI ang imbestigasyon sa mga imprastraktura sa flood control nga kanhi gibisita ni Pang. Ferdinand Marcos Jr.
