Gipasalig sa Department of Justice nga dili nila ibaliwala ang mga hinabang nga gihatag sa nagkadaiyang ahensya sa gobyerno kalabot sa isyu sa mga nangawala nga sabungero.
Matud pa ni Justice Secretary Jesus Crispin Remulla, ang pagpangita sa mga patayng lawas sa mga nawala nga mga sabungero usa ka paningkamot sa gobyerno aron matino ang kamatuoran.
Kini human sa pagpahibawo sa ilang kaandam, ilabina sa Philippine Navy, Philippine Coast Guard, ug bisan sa Department of Environment and Natural Resources kon DENR.
Busa, gipasalig sa maong kalihim nga dawaton gihapon niya ang tabang sa maong mga ahensya aron makit-an ang mga patayng lawas sa mga missing nga sabungero.
Kini bisan pa sa iyang pagpangayo kaniadto og tabang gikan sa Japan aron makahimo og diving operation sa bahin sa Taal Lake.
Dugang pa ni Remulla nga ila pang giila ang mga espisipikong ekipo nga mahimong mahulam gikan sa Japan alang sa diving operation.
Kahinumduman nga gibutyag sa usa ka saksi nga giilang si alyas ‘Totoy’ o Julie ‘Dondon’ Patidongan nga ang mga nawala nga sabungero giingong gilubong sa Taal Lake.
Sa pagkakaron, wa pay tubag ang Japan sa maong suwat samtang nagpadayon ang imbestigasyon ug case buildup sa DOJ kalabot sa kaso sa mga ‘missing sabungeros’.
