Gipahibalo sa Department of Health (DOH) nga padayon ang pagsaka sa ihap sa kaso sa dengue sa nasud, ug kini karon giisip nga seryosong hulga sa pampublikong kahimsog.
Gikan sa Enero hangtod Hunyo 2025, misaka na sa 23,000 ang kaso sa dengue — 59% nga mas taas kumpara sa parehas nga panahon kaniadtong miaging tuig.
Sa maong ihap, 470 na ang natala nga namatay.
Ang pinakataas nga ihap sa kaso mao sa rehiyon sa CALABARZON, nga adunay 19,500 ka kaso ug 62 ang namatay.
Matod ni Health Secretary Teodoro Herbosa, lisod pugngan ang pagsaka sa kaso sa dengue hangtod dili masulbad ang mga lugar diin nangitlog ang mga lamok.
Tungod niini, gisusi karon sa DOH ang paggamit sa Wolbachia method — usa ka modernong pamaagi gikan sa Jakarta, Indonesia, nga mogamit og bacteria aron pugngan ang pagdaghan sa mga lamok nga nagdala sa dengue.
Gawas pa niini, ginatan-aw usab ang paggamit sa QDenga — usa ka bakuna batok sa dengue nga gigamit na sa kapin 40 ka nasud. Apan gipasabut sa DOH nga para pa lang kini sa mga ospital ug dili pa alang sa kinatibuk-ang pagpamakuna.
Sumala ni Secretary Herbosa, kinahanglan pa nga magsumite ang pharmaceutical company og risk management plan, ilabi na kini nga bakuna giwagtang na sa ubang mga merkado sama sa Estados Unidos.
Gisuportahan usab sa Philippine Medical Association (PMA) ang paggamit sa QDenga. Sumala ni PMA President Dr. Hector Santos, mas luwas kini kumpara sa Dengvaxia tungod kay ang QDenga gibase sa tinuod nga mga kaso sa dengue, ug dili gikan sa yellow fever strain.
