Gipahimangnoan sa Department of Health (DOH) ang publiko kalabot sa epekto sa sakit sa kainit, ilabi na niadtong mopaingon sa mga baybayon karong Semana Santa.
Gibutang usab sa DOH ang tanang publikong ospital ug pasilidad sa panglawas sa tibuok nasod sa “Code White” alert aron masiguro ang kaandam sa mga personnel sa pagtubag sa bisan unsang posibleng emerhensya sa panglawas, ilabi na karong panahon sa Kwaresma.
Matud pa ni Health Secretary Ted Herbosa, grabe ang kainit karon busa angayan nga magmatngon ang atong mga katagilungsod.
Gitambagan ni Herbosa ang publiko nga moadto sa mga baybayon ug uban pang publiko nga lugar nga mogamit og sunscreen, magpabilin nga hydrated, ug likayan ang dugay nga pagkaladlad sa init.
Matod sa Kalihim, kung makasinati og taas nga temperatura sa lawas ang usa ka tawo, kinahanglan nga mobugnaw dayon.
Ang mga simtomas sa init nga lawas mao ang grabeng kauhaw ug bugnaw nga singot, sa ingon makapugong sa pagkaluya.
Gitataw ni Herbosa nga kasagarang makasinati og grabeng kainit mao ang mga tigulang ug mga bata.
Gitambagan usab ni Herbosa ang mga ginikanan nga bantayan ang ilang mga anak sa paglangoy aron malikayan ang pagkalumos.
