Giawhag sa Department of Health (DOH) ang publiko nga pahimuslan ang mga outpatient dental benefits sa PhilHealth nga mokantidad hangtod sa ₱1,000 matag miyembro, isip kabahin sa primary care package.
Sa usa ka interbyu gipasiugda sa mga opisyal sa DOH ang kamahinungdanon sa preventive dental care tungod kay ang mga advanced dental problems mas sakit, mahal, ug lisod tambalan.
Sumala ni DOH Undersecretary Dr. Emmie Liza Perez-Chiong, mas maayo nga magpakonsulta sa dentista kaduha sa usa ka tuig, ug mas kanunay alang niadtong dali nga mataptan og plaque.
Giawhag usab niya ang mga ginikanan nga dad-on ang ilang mga anak sa dentista sa diha nga mobuto ang ilang unang ngipon aron matudloan og sayo ang maayong mga batasan sa pag-atiman sa ngipon.
Ang PhilHealth dental benefit naglangkob sa duha ka paglimpyo sa ngipon kada tuig, mga dental checkup, fluoride applications para sa mga bata ug mga hamtong, ug pit ug fissure sealant aron malikayan ang pagkadunot sa ngipon bisan kung wala pa’y mga lungag.
Samtang, si DOH Secretary Teodoro Herbosa miingon nga ang PhilHealth karon nag-accredit sa mga dentista nga modawat og mga pasyente ubos sa dental benefit package.
Giangkon usab sa DOH nga adunay kakulangon sa mga dentista sa nasud, nga adunay usa ra ka dentista sa matag 52,000 ngadto sa 53,000 ka mga Pilipino, layo ra sa sulundon nga 1:7,500 nga gitakda sa World Health Organization. Usa sa mga hinungdan niini mao ang giingon nga ubos nga sweldo nga nagduso sa mga dentista sa pagtrabaho sa gawas sa nasud.
