Gipahimangnoan sa Department of Health (DOH) ang publiko nga mag-andam ug emergency go bag sa higayon nga kinahanglan silang mobakwit tungod sa posibilidad nga adunay tsunami nunot sa kusog nga 7.4 magnitude nga linog nga miigo sa Davao Oriental kagahapong adlawa , Oktubre 10.
Matod sa ahensya, lakip sa kinahanglan nga andamon sa Go Bag alang sa dali nga pagbakwit mao ang pagkaon lakip na ang tubig, snacks, utensils ug canned goods.
Importante usab nga ibutang sa Go bag ang First aid kit, sama sa alcohol, band aid, povidone-iodine, ointment para sa samad, paracetamol, mefenamic acid ug maintenance medicine.
Dugang pa, ang mga gamit sa banyo lakip na ang dugang nga maskara, toothbrush, sanitary pad, hand sanitizer, insect repellent, toothpaste, tissue, shampoo ug sabon.
Ang ubang butang nga angay iapil sa emergency go bag mao ang can opener, habol o kupo, power bank, extension card, pocket knife, battery operated radio, light jacket, flashlight, charger, tsinelas ug raincoat.
Gitambagan usab ang publiko nga kung adunay emerhensya, tawagan dayon ang hotline 911 o ang DOH hotline 1555 ug i-press ang numero 3.
