Gipahugtan sa Department of Health ang pagbantay sa presyo sa mga tambal tungod sa nagpadayon nga oil crisis, sumala sa pahayag ni DOH spokesperson nga si Albert Domingo niadtong Marso 27, 2026.
Matud pa niya, padayon ang monitoring sa ahensya uban sa inventory checks ug contingency planning ilabina sa mga ospital aron masiguro nga dili maputol ang suplay sa tambal ug medical supplies.
Gihimo kini human magpasidaan ang usa ka ekonomista nga posibleng maapektuhan sa inflation ang sektor sa panglawas tungod sa tensyon sa Middle East.
Gidugang pa ni Domingo nga kinahanglan andam usab ang PhilHealth sa posibleng pagsaka sa demand sa health services.
Samtang, gi-awhag ang publiko nga sabton ang “unbundling” o detalyadong breakdown sa bayranan sa mga pribadong ospital aron mas masabtan ang pagtaas sa singil.
Nagpasalig usab ang DOH nga magpadayon ang suporta pinaagi sa Zero Balance Billing ug benepisyo sa PhilHealth aron matabangan ang mga pasyente.
