Gikompirmar sa Department of Health (DOH) nga walay natala nga kaso sa bag-ong COVID-19 variant NB.1.8.1 o “Nimbus” sa nasod.
Matud ni DOH spokesperson Asec. Albert Domingo, ubos ang risgo sa maong variant sumala sa World Health Organization (WHO).
Bisan kung adunay mga simtomas susama sa sip-on, hilanat ug sakit sa tutunlan, dili kini hinungdan sa grabe nga sakit sama sa kalisud sa pagginhawa.
Kahinumduman nga sukad niadtong Enero 2025, niabot na lang sa 2,760 ka kaso sa COVID-19 ang natala sa nasud, nga mas ubos og 87% kumpara kaniadtong 2024.
Ang COVID-19 bed occupancy rate nagpabilin usab ubos sa 10%.
Bisan og wala nay aktibong pagbakuna, epektibo gihapon ang mga naunang bakuna batok sa variant sa Nimbus, sumala sa DOH.
Sa laing bahin, ang mga kaso sa dengue mikunhod og 5% ngadto sa 6% matag semana, apan ang DOH nipasidaan nga gilauman nga mosaka karong panahon sa ting-ulan.
Niabot na og 123,000 ang kaso sa dengue sukad niadtong Enero ning tuiga diin kasagaran niini nakaapekto sa mga bata nga nag-edad og 5 hangtod 9.
