GENERAL SANTOS CITY -Gipasalig sa Department of Health (DOH) nga ilaha nang gina-mobnitor ang suspected measles outbreak sa Upper Suyan, Malapatan, kung asa 18 ka mga bata na ang gika-report nga namatay tungod sa tipdas.
Sumala pa nga adunay natala nga lain pang 84 ka suspected measles cases, kung asa gikan sa edad nga upat ka bulan ngadto sa 40 years old, ug kadaghanan mga bata. Giklaro sa ahensya nga wala pa nila gideklarang measles outbreak ang panghitabo tungod ginakumpleto pa ang pagsuta aron makumpirma kon tipdas gayud ang nasinatian sa mga tawo sa nahisgutang lugar.
Kahibaluan nga napadala na sa Research Institute for Tropical Medicine alang sa laboratory confirmation, ang blood samples gikan sa 12 ka suspected cases.
Una nang gikareport nga nadugangan pa ang ihap sa mga sitio nga apektado sa maong sakit, nga karon anaa na sa 12 ka sitio.
Kahibaluan nga misaka na kagahapong adlawa ang ikaduhang batch sa medical team aron magpahigayon ug tulo ka adlaw nga mass vaccination ug mukuha ug dugang blood samples gikan sa mga apektadong residente, luyo sa nahitabo nga engkwentro sa lugar tali sa mga sundalo ug NPA.
Ginamonitor ug gipapaamping na usab sa DOH ang mga kasikbit barangay ug munisipyo aron dili mataptan sa tipdas, hilabi na nga paspas matud pang mukatag ang maong sakit.
