Gipahibalo sa Department of Health (DOH) nga 55 pa lamang ka kaso sa mpox ang natala sa nasud gikan Enero 4 hangtod Hunyo 13 karong tuiga.
Sumala ni DOH Spokesperson Dr. Albert Domingo, mas ubos kini og 79 percent kumpara sa 205 ka kaso nga natala sa parehas nga panahon sa miaging tuig.
Gipasiguro sa DOH nga wala’y outbreak o pagsaka sa gidaghanon sa mga kaso sa mpox sa nasud sa pagkakaron.
Dugang pa sa ahensya, dili nila ipagawas sa publiko ang detalye sa matag kaso aron malikayan ang stigma ug mapanalipdan ang pribasiya sa mga pasyente.
Samtang, ang mga lokal nga panggamhanan maoy naghatag og angay nga pahibalo sa publiko kabahin sa mga kaso sulod sa ilang lugar.
Ang pahayag sa DOH nahitabo human gikumpirma sa Pamahalaang Lungsod sa Mandaluyong ang usa ka kaso sa mpox, diin dayon silang nagpahigayon og contact tracing ug uban pang mga lakang aron mapugngan ang pagkatap sa sakit.
