Nimando ang Department of Energy (DOE) sa mga kompaniya sa lana sa pagmentinar og igong imbentaryo sa mga produktong petrolyo taliwala sa nagpadayong tensiyon sa Middle East, partikular na sa nagpadayong panagbangi tali sa Israel ug Iran.
Matod ni DOE Officer-in-Charge Sharon Garin, kinahanglang siguruhon sa mga oil firm nga aduna silay 30 ka adlaw nga suplay sa krudo ug 15 ka adlaw nga imbentaryo sa refined petroleum products. Kini aron mamentinar ang usa ka lig-on nga imbentaryo sa mga lana ug malikayan ang mga kakulang kung mograbe ang krisis sa rehiyon.
Sa samang higayon, andam usab ang DOE sa pagpatuman sa mga hinabang ug mga subsidyo sa gobyerno ubos sa kasamtangang mga balaod, sama sa TRAIN Law, kon moabot sa $80 matag baril ang presyo sa lana sa kalibotanong merkado.
Samtang, ang DOE padayon nga hugot nga nag-monitor sa mga oil depot ug global nga presyo sa lana aron mapatuman dayon ang tukmang mga lakang sa pagpanalipod sa mga konsumidor ug apektadong sektor sama sa transportasyon ug agrikultura.
