Nag-andam ang Department of Migrant Workers ‘reintegration assistance’ alang kang Mary Jane Veloso human siya gihatagan og absolute pardon ni President Ferdinand Marcos Jr.
Gimandoan ni Migrant Workers Secretary Hans Leo Cacdac ang usa ka team nga moadto sa Nueva Ecija aron makigkoordinar sa pamilya ni Veloso ug sa mga lokal nga opisyal alang sa angay nga assistance package.
Lakip sa suporta nga giandam sa DMW ug OWWA ang ‘psychosocial counseling’, ‘livelihood starter kits’, puhunan alang sa negosyo ug skills training.
Mahimo usab nga ikonektar ang mga plano ni Veloso sa negosyo ngadto sa mga kooperatiba ug economic programs sa Nueva Ecija.
Nakapauli na si Veloso ug nakig-uban pag-usab sa iyang pamilya human siya nakagawas sa Correctional Institution for Women sa Mandaluyong City sayo niadtong Sabado sa kaadlawon.
Napriso si Veloso sa Indonesia niadtong 2010 human giingong nabiktima siya sa ‘human trafficking’ ug nadala ang usa ka maleta nga adunay 2.6 ka kilo nga ‘heroin’.
Sumala sa DMW, importante sa iyang kaso ang prinsipyo sa non-punishment alang sa mga biktima sa trafficking nga nalimbongan o gipahimuslan sa pagbuhat sa mga krimen nga resulta sa trafficking.
