Walay Pilipino nga naapektuhan human sa missile attack sa mga Houthi nga gisuportahan sa Iran sa Riyadh, Saudi Arabia.
Sumala sa pinakabag-ong update sa Department of Migrant Workers o DMW, padayon nilang gimonitor ang kahimtang sa mga Pilipino sa maong nasod.
Gipahinumdoman usab ang mga overseas Filipino workers o OFWs nga mag-amping ug mosunod sa mga pahibalo ug direktiba sa Saudi authorities.
Kini ang unang pag-atake sa mga Houthi sa Riyadh sukad mibalik ang panagbangi sa Yemen.
Gikontrol sa mga Houthi ang dakong bahin sa Yemen ug nakig-away sa mga pwersa sa gobyerno nga gisuportahan sa coalition nga gipangulohan sa Riyadh.
Niadtong Sabado, nadungog ang kusog nga mga pagbuto sa Saudi capital, samtang nakita ang usa ka fuel tank nga adunay logo sa oil giant nga Aramco nga nasunog duol sa airport.
Nagpahimangno usab ang US State Department nga posible pang mosamot ang military conflict ug giawhag ang mga American citizens nga anaa sa gawas sa Middle East nga mainampingong ikonsiderar ang ilang pagbiyahe ngadto o pag-agi sa maong rehiyon.
Gipugngan usab sa US State Department ang pagbiyahe sa mga empleyado sa gobyerno sa Estados Unidos ngadto sa mga siyudad sa Taif ug Yanbu sa Saudi Arabia.
