Gisiguro ug gikumpirma sa Department of Migrant Workers (DMW) nga luwas ang 31 ka Overseas Filipino Workers (OFWs) nga ilang gisundo human maipit sa ilang na-delayed nga flight pabalik sa Pilipinas.
Kini tungod temporaryo nga gisira sa Qatar ang ilang ‘airspace’ karong adlawa, hinungdan nga naantala ang naka-skedyul nga ‘repatriation flight’ sa pipila ka mga Pilipino.
Sumala sa pahayag nga gibuhian sa Department of Migrant Workers pinaagi sa mensahe ni Secretary Hans Leo Cacdac, ilang gisiguro ang kaluwasan sa mga kauban nilang OFW’s.
Matud nila, tutok ang mga opisyal sa gobyerno, ilabi na ang embahada sa Pilipinas, aron matubag ang repatriation sa mga Pilipino nga naipit sa kasamok tali sa Iran ug Israel.
Kini usab nagasunod sa mando ni Pangulong Ferdinand Marcos Jr. nga hatagan og tabang ug siguruhon ang koordinasyon sa mga otoridad sa Qatar.
Nagpadayon usab ang koordinasyon sa departamento ug sa Qatari Ministry of Interior, nga maoy nagapanguna sa plano sa pagpapauli sa mga Pilipino.
Gipasalamatan kini sa Department of Migrant Workers.
Tungod niini, ilang panawagan nga likayan ang pagpakaylap sa sayop nga impormasyon aron malikayan ang panic, ug ilang gipahimangno nga magpabiling kalmado ilabi na sa mga OFWs nga naa sa Middle East.
