GENERAL SANTOS CITY –Sikop ang usa ka dispatcher ug usa ka driver sa natigayong buy-bust operation sa Brgy Dadiangas West ning dakbayan, alas-2:30 kagahapon sa hapon.
Gipahigayon sa Philippine Drug Enforcement Agency (PDEA-12) ang naasoy’ng operasyon, kung asa ang nasikop giilang sila si Johnny Dalandas Alias Johnny, 51 anyos, minyo, residente sa naasoy’ng lugar, ug anaa sa watchl-list sa naasoy’ng ahensya, ug si Tirso Torres Alias Tirso, 42 anyos, residente sa Obrero Street, Brgy Dadiangas North ning siyudad.
Kini human napalitan ang duha ug usa ka sachet sa shabu sa PDEA Agent nga nagpakaron-ingnon nga poseur-buyer, sa kantidad nga P500. Nakumpiska usab sa mga otoridad ug unom ka gagmay’ng sachet sa shabu nga may estimated value nga P15,000, ug usa ka all-weather pipe tooter.
Kasamtangang balhug ang duruha sa PDEA RO12 Detention Facility ug nag-atubang ug kasong pagsupak sa Section 5 (pagbaligya), Section 11 (paghupot) ug Section 12 (kon paghupot ug drug paraphernalia) sa RA 9165 kon The Comprehensive Dangerous Drugs Act of 2002.
