GENSAN- Nag-awhag si Senador Imee Marcos nga repasuhon pag-ayo ang paggamit sa mga online games imbes nga ipatuman dayon ang hingpit nga pagdili niini.
Matod sa senadora, dili angay nga i-ban ang tanang online games tungod kay adunay mga dula nga makatabang sa edukasyon sa mga bata.
Bisan pa niini, nanawagan siya sa National Telecommunications Commission (NTC), Department of Information and Communications Technology (DICT), University of the Philippines ug uban pang mga eksperto sa teknolohiya aron susihon pag-usab ang mga online platform ug masiguro nga adunay lig-on nga mga mekanismo sa pagpanalipod sa mga menor de edad.
Gihisgutan usab ni Marcos ang iyang pending bill nga nagdili sa mga bata nga ubos sa 16 anyos sa paggamit sa social media hangtod ma-regulate kini sa husto.
Dugang pa niya, bisan ang mga educational games kinahanglan adunay sayon gamiton nga parental controls ug mga safety features aron dali kining magamit sa mga ginikanan.
Gipasiugda usab sa senadora nga pabor siya sa gaming, animation ug film industry, apan giingon niyang lisod ma-regulate ang ubang online platforms tungod kay ang ilang mga tag-iya anaa sa gawas sa nasud ug walay opisina sa Pilipinas, maong kinahanglan kini hatagan og mas lawom pa nga pagtan-aw
