Gikumpirma ni Department of the Interior and Local Government Secretary Jonvic Remulla nga nasayop siya sa pag-ingon nga hingpit nang gibasura sa Austria ang ‘asylum application’ ni kanhi presidential spokesperson Harry Roque.
Matod ni Remulla, posible nga wala kini maaprobahan o posible usab nga nadawat, busa wala pa siya’y konkretong impormasyon bahin sa kahimtang sa aplikasyon.
Dugang pa niya, kasagarang proseso ang unom ka bulan alang sa ‘asylum application’ ug siyam na ka bulan ang milabay, busa posible nga naaprobahan na kini o gibasura.
Gipaklaro ni Remulla nga sa mata sa balaod, wala gihapon si Roque og ‘asylum’, busa ang hustisya kinahanglan gihapon nga mapatuman.
Kahinumdomna nga sa miaging mga semana, giingon ni Remulla nga gibasura na ang ‘asylum request’ ni Roque human molapas sa lima ka bulan nga gitakdang panahon.
Gisiguro usab ni Remulla nga ilang dakpon si Roque kung mapagawas na ang ‘red notice’ sa Interpol batok kaniya.
