Misaad ang Department of the Interior and Local Government (DILG) nga mohatag ug dugang tabang sa mga Filipino sa Israel, ilabi na kon mograbe ang tensyon tali sa Iran ug Israel.
Kini ang mga pamahayag ni DILG Secretary Jonvic Remulla human sa mainitong pag-abiabi sa 17 ka mga opisyal nga luwas nga nakauli sa Pilipinas gikan sa ilang study tour sa Israel.
Matod pa niya nga 24/7 ang monitoring sa ilang buhatan aron masiguro nga luwas nga makauli sa nasod ang mga opisyal nga walay problema.
Tungod niini, gipasalig ni Remulla nga andam ang ilang buhatan, sa pakigtambayayong sa Department of Foreign Affairs (DFA) ug bisan sa Office of the President (OP), sa pagtubag sa mga kababayan nga nagpabilin sa nasod taliwala sa tensiyon tali sa Iran ug Israel.
Sa laing bahin, andam ang mga departamento nga magdala og mga eroplano sa higayon nga adunay daghang mga Pinoy nga nanginahanglan og tabang nga makabalik sa nasud aron masiguro ang ilang kaluwasan.
Sa pagkakaron, gikan sa 30,000 ka mga Filipino sa Israel, 191 lang ang mihangyo nga ipailalom sa repatriation.
