Mas gikabalak-an matod pa sa Department of the Interior and Local Government o DILG ang posibilidad nga manumbag si Vice President Sara Duterte atol sa iyang pag-file og bail sa Regional Trial Court o RTC sa Quezon City, may kalabotan sa iyang giatubang nga tulo ka counts sa grave threats.
Kini kung itandi sa posibilidad nga adunay mga kilos-protesta nga pagahimuon sa pipila ka grupo aron depensahan si VP Sara.
Matud ni DILG Secretary Jonvic Remulla, mas ilang gikabalak-an ang posibleng reaksiyon sa bise presidente ngadto sa mga personnel sa Criminal Investigation and Detection Group o CIDG nga mosilbi sa warrant of arrest batok kaniya.
Matud pa ni Remulla, nahitabo na kaniadto nga nanakit ang bise presidente sa usa ka court sheriff atol sa iyang pagserbisyo isip local executive sa Davao City.
Gipahayag usab ni Remulla nga wala nila gitagad ang giingong drama ni VP Sara Duterte bahin sa posibilidad nga posasan ug mapriso siya, apan ilang gipakita gihapon ang respeto sa iyang posisyon isip Bise Presidente.
Sumala pa ni Remulla, adunay mokabat sa 400 ka security personnel nga naka-assign kang VP Sara, busa dili na kinahanglan ang dugang nga surveillance alang sa iyang seguridad.
Kini human nga ma-isyu ang warrant of arrest batok kang VP Sara tungod sa tulo ka counts sa grave threats.
Gipagawas ni Remulla ang maong pahayag human giingon ni VP Sara nga wala siyay pagsalig sa korte ug sa mga pulis, sa wala pa siya misulod sa RTC aron mag-file sa iyang bail.
