Gimanduan sa Department of the Interior and Local Government (DILG) ang mga local chief executives (LCEs) nga higpit nga gidid-an ang bisan kinsa nga mosulod sulod sa upat ka kilometro nga “permanent danger zone” palibot sa Bulusan Volcano sa Sorsogon, human sa phreatic eruption nga nahitabo niadtong Abril 28.
Base sa rekomendasyon sa Philippine Institute of Volcanology and Seismology (Phivolcs), gitambagan usab sa DILG ang mga lokal nga kagamhanan nga magmabinantayon sa gipalapdan nga danger zone sa bulkan, tungod sa hulga sa pyroclastic density currents, ballistic projectiles, rockfall, landslide, ug ash fall.
Sa usa ka advisory, giawhag sa DILG ang mga LCE nga ipatuman ang “Operation L!sto” protocols alang sa pagbuto sa bulkan ug makig-alayon sa ilang tagsa-tagsa ka Regional Disaster Risk Reduction and Management Councils (RDRRMCs).
Gitambagan usab ang mga komunidad nga magsul-ob og face mask o basa nga mga panapton aron malikayan ang paghingus sa abo, ug pagpabiling alerto ilabina sa ubos nga mga dapit ug mga sapa nga mahimong bahaan sa lahar panahon sa kusog nga ulan.
Gitambagan usab ang mga awtoridad sa abyon nga likayan ang paglupad duol sa summit sa bulkan.
Sa mga taho, gibanabana nga kapin sa 29,000 ka mga tawo sa 25 ka barangay sa Sorsogon ang naapektuhan sa pagbuto, samtang 1,132 ka pamilya gikan sa barangay Buraburan, Guruyan, Calmayon, Catanusan, ug Puting Sapa ang limitado sa tubig nga mainom.
Samtang niabot na sa P675,000 ang gikataho nga kadaot sa agrikultura sa lungsod sa Juban nga nakaapekto sa 45 ka mag-uuma.
Ang Bulusan Volcano nagpabilin gihapon sa alert level 1 (low-level unrest).
