Gimandoan sa Department of the Interior and Local Government (DILG) ang dinaliang imbestigasyon sa giingong dili hustong pagresponde sa Emergency 911 sa Taguig City.
Nagsugod ang reklamo human nanawagan og tabang ang usa ka lalaki pinaagi sa Emergency 911 tungod kay nanginahanglan og medical assistance ang iyang amahan.
Apan tungod sa giingong kakulang sa mga kagamitan sa ambulansyang niresponde, namatay ang amahan niini.
Matud ni DILG Secretary Jonvic Remulla, iyang nakontak si Director Francis Fajardo sa DILG Emergency Call 911, diin nadawat ang tawag alas-12:15 sa udto niadtong Sabado.
Ang biktima usa ka 71-anyos nga lalaki ug residente sa Maharlika Village, Taguig, nga giatake og mild stroke ug nanginahanglan og ambulansya.
Gibalhin ang tawag ngadto sa Taguig Command Center alas-12:17 sa hapon, diin misaad ang mga personnel nga magpadala og ambulansya.
Apan wala na makadawat og kumpirmasyon ang DILG kung nakapadala ba gyud og ambulansya ngadto sa maong lugar.
Dugang ni Remulla, base sa inisyal nga report, posibleng adunay problema sa pagdumala sa kaso sa mga personnel nga naka-duty.
Una nang gikumpirma sa DILG nga ilang giimbestigahan ang insidente human moabot sa hapit 10 minutos ang paghulat sa wala pa matubag ang tawag sa Emergency 911
