GENERAL SANTOS CITY – Mag-abli na karong Abril 3 ang dialysis center sa Dr. Jorge P. Royeca Hospital kung asa kapin 100 mga kabus nga pasyente ang makabenepisyo niini.
Gibutyag ni Glenville Gonzales, ang overseer sa maong ospital nga na-orient na ang 108 ka pasyente nga nakalista alang sa mga polisiya sa dialysis center.
Matud pa niini, andam na ang Dialysis center alang sa pormal nga pag-operate niini sunod nga semana. Pagpaklaro pa niini, libre ang unang 90 session subay sa no balance billing na polisiya sa philhealth apan 104 session ang kinahanglan sa pasyente.
Kung muabot na sa ika-91 session, may singlon na ang ospital.
Ug aron dili bug-at sa pasyente, giawhag nila na kada sesyon magbayad og P400 ang pasyente nga magsilbing tigom o pondo aron pangbayad sa mga session pagkahuman sa 1st 90 session.
Sa pamahayag ni Gonzales, kung adunay dili maayong mahitabo sa pasyente, i-refund nila ang unang nabayad nga ihatag ngadto pamilya.
Kahibaluan, adunay 13 ka mga bag-ong machines ang dialysis center.
Gikan sa 315 ka pasyente nga nakalista, mukabat sa 108 indigents ang nakapasa sa screening nga gipahigayon.
Nasuta nga ang dialysis center ang padaganon sa doctor og nurse nga may kahibalo sa paggamit sa dialysis machines.
