Nanawagan ang Department of Foreign Affairs (DFA) sa China nga siguruhon ang kaayohan ug mga katungod sa kapin 100 ka Pilipino nga gidakop tungod matod pa sa ilegal nga pagtrabaho o pagpuyo sa maong nasod.
Gikumpirma sa DFA ang dinagkong pagdakop human miingon ang Chinese Foreign Ministry nga nagpahigayon sila og aksyon batok sa kapin 100 ka Pilipino nga gidudahang ilegal nga nagtrabaho sa China.
Matud sa DFA, giila sa Pilipinas ang katungod sa China sa pagpatuman sa kaugalingon niining immigration laws, basta lamang nga gisunod ang hustong proseso.
Bisan pa niini, gihangyo sa ahensya ang mga awtoridad sa China nga panalipdan ang kahimtang sa mga Pilipinong napriso ug ipahibalo dayon sa Philippine Foreign Service Posts ang ilang pagkadakop.
Sumala sa DFA, uyon kini sa Vienna Convention on Consular Relations ug sa 2013 Philippines-China Consular Agreement.
Nakigkoordinar na ang DFA sa Philippine Embassy sa Beijing ug sa mga Philippine Consulate-General sa China aron mahibal-an ang eksaktong gidaghanon sa mga Pilipinong gidakop ug ang mga hinungdan sa ilang pagkakulong.
Gisusi usab sa ahensya kung nasunod ba ang legal ug consular procedures sa pagdakop sa mga Pilipino.
Samtang, hugot nga gisaway ni Defense Secretary Gilbert Teodoro ang pagdakop sa China sa mga Pilipino.
Gitawag niya kini nga usa ka porma sa “blackmail” ug gikondena ang giingong paggamit sa mga Pilipino isip pamaagi aron manghilabot sa proseso sa pagpatuman sa balaod sa Pilipinas.
