Nabalaka ang Department of Foreign Affairs sa nagkadaghang mga Pilipino nga biktima sa human trafficking nga natanggong sa mga scam center sa tibuok Southeast Asia.
Matod sa ahensya, makaalarma ang maong mga taho, apan bisan pa niini, wala gitumbok sa ahensya kung pila ang ilang nadawat nga taho.
Ang ahensya miingon usab nga nakig-alayon na sila sa ilang mga silingang nasud sama sa Mainland Southeast Asia nga naglakip sa (Thailand, Myanmar, Lao PDR ug Cambodia).
Misaad usab kini nga tabangan ang mga Pilipino nga naa sa kalisud samtang nakig-alayon sa ubang mga nasud aron makigtambayayong sa Pilipinas.
Gipasiugda sa DFA nga nagpabilin silang nagpasalig sa pagluwas ug pagpauli sa tanang Pilipino nga biktima sa Human Trafficking.
Nanawagan usab kini sa tanang Pilipino, komunidad sa gawas sa nasud nga suportahan ang mga paningkamot sa gobyerno sa Pilipinas nga mapugngan ang tanang matang sa illegal recruitment ug pagpahimulos.
