Wala pa’y kasayuran kung adunay mga Pilipino nga naapektuhan sa pagpamomba sa US sa tulo ka mga nuclear sites sa Iran, sumala sa Department of Foreign Affairs (DFA).
Sa usa ka pakighinabi, si DFA Assistant Secretary Robert Ferrer miingon nga dili klaro kung adunay mga Pilipino nga naa sa mga naigo sa mga airstrike apan gipahinumdoman ang mga Pilipino nga likayan ang mga pasilidad sa Iran.
Matod ni Ferrer, adunay gibanabana nga 1,200 ka mga Pilipino sa Iran, ug siyam na ang mihangyo nga mobalik sa Pilipinas.
Gipasalig usab ni Ferrer nga ang mga personahe sa Philippine Embassy sa Tehran mao na ang kataposang mobiya sa nasod, aron maseguro nga maatiman una ang mga gustong mopauli.
Sa laing bahin, 223 ka mga Filipino sa Israel ang nangayo og repatriation, . Gibanabana nga mokabat sa 30,000 ka mga Pilipino sa Israel.
Usa ka Filipino ang anaa sa kritikal nga kahimtang, samtang pito ang nakagawas na sa tambalanan.
Nasayran nga moabot sa 88 ka mga panimalay sa mga Pinoy ang gikataho nga naguba tungod sa mga airstrike sa Iran, ug 80 ka mga tawo ang gipahikliong sa mas luwas nga mga dapit.
Samtang niadtong Biyernes, gipasaka sa gobyerno sa Pilipinas ang Iran ug Israel ngadto sa Crisis Alert Level 3, nga nagpasabot nga ang mga Pilipino sa nasangpit nga mga nasud gitambagan nga boluntaryong mamauli tungod sa nagkagrabeng tensyon sa rehiyon.
