Gikumpirma sa Department of Foreign Affairs (DFA) nga walay mga Pilipino nga nasamdan sa pagpamusil sa Bondi Beach, Sydney, Australia, nga mikalas og 12 ka patay ug 30 ang nasamdan.
Nahitabo ang insidente niadtong Disyembre 14, atol sa selebrasyon sa Hanukkah sa komunidad sa mga Hudiyo diin daghang mga tawo ang nagtapok.
Sumala ni New South Wales Police Commissioner Mal Lanyon, usa ka suspek ang namatay sa lugar, ug ang usa anaa sa kritikal nga kondisyon.
Nagpadayon pa ang imbestigasyon aron mahibal-an kung nalambigit ba ang ikatulong gunman. Nakakita usab ang mga awtoridad og gituohang mga improvised explosive device sa lugar.
Gikondenar ni Prime Minister Anthony Albanese ang insidente, nga iyang gitawag nga usa ka targeted assault batok sa komunidad sa mga Hudiyo.
Gipaabot sa DFA ang iyang pahasubo sa mga biktima ug sa ilang mga pamilya, ug gipahinumdoman ang mga Pilipino sa Sydney nga magpabiling mabinantayon ug mosunod sa tambag sa mga awtoridad.
Gipahinumdoman usab ang mga nanginahanglan og tabang nga kontakon ang Philippine Consulate General sa Sydney.
