Giklaro sa hepe sa National Capital Region Police Office (NCRPO) nga dili overkill ang deployment sa 23,000 ka polis ug ubang force multipliers alang sa ikatulong State of the Nation Address (SONA) ni Presidente Ferdinand Marcos Jr. ugma, Hulyo 22.
Pagpasabot ni NCRPO chief Maj. Gen. Jose Melencio Nartatez Jr. nga dul-an sa 2,000 ka mga VIP sama sa mga opisyal sa gobyerno ug mga diplomat ang anaa sa House of Representatives alang sa SONA samtang dul-an sa 8,000 ka mga tawo ang gipaabot nga mosalmot sa mga rally gawas sa Batasang Pambansa.
Gitataw sa kadagkoan sa NCRPO nga ilang gisiguro usab nga hapsay ug malinawon ang paghatod sa report ngadto sa katawhan ni Presidente Marcos.
Una nang niingon si Nartatez nga dugang 1,000 ka personnel ang ipakatap aron masiguro ang seguridad sa SONA, busa 23,000 na ang kinatibuk-ang ihap sa police ug government security elements nga ipakatap.
Sa nasangpit nga gidaghanon, 8,000 ka law enfrocers ang idestino sa Commonwealth Avenue ug IBP road diin gipaabot nga mopahigayon og rally ang mga pro-government ug militanteng grupo.
