Gibarugan sa kampo ni Vice President Sara Duterte nga wala nila gipalangan o gituyo nga langanon ang impeachment trial batok kaniya sa Senado.
Matod ni Atty. Michael Poa, tigpamaba sa legal team ni Duterte, lehitimo ang mga pagsupak sa depensa ug gihimo lamang kini kung gikinahanglan, supak sa nagkalainlaing haka-haka sa social media kasunod sa mga pagsupak ni Atty. Carlo Joaquin Narvasa.
Gipasabot ni Poa nga gusto usab sa ilang kampo nga mahuman dayon ang paghusay aron dili na magdugay ang pagdungog sa kaso batok sa ilang kliyente. Nagtuo usab siya nga ingon man ang panig sa prosekusyon, nga gusto usab nga matapos ang pagdungog sa labing dali nga panahon.
Samtang, sumala kang Trial Presiding Officer Francis Escudero, posible nga mopaspas ang dagan sa proseso sa umaabot nga mga adlaw. Una nang gibanabana nga moabot ug hangtod walo ka bulan aron makompleto ang 92 ka adlaw sa trial.
