Giklaro sa Department of Education (DepEd) nga fake news ang mga mikatag nga report kabahin sa online Saturday classes alang sa mga estudyante sa elementarya ug senior high school (SHS).
Kini ang giklaro sa ahensya human nga nag-viral sa social media ang advisory nga giingong gikan sa DepEd nga nag-ingon nga adunay klase ang mga bata sa elementarya, junior ug senior high school matag Sabado sugod Hulyo 5.
Kalabot niini, subling gipahinumdoman sa DepEd ang publiko nga magmabinantayon ug mahimong kritikal sa bisan unsang matang sa sayop nga impormasyon.
Gitambagan usab ang publiko nga i-refer lang ang official social media accounts sa DepEd alang sa mga anunsyo ug impormasyon.
Kahinumduman nga nagsugod ang klase sa mga pampublikong tulonghaan alang sa School Year 2025-2026 niadtong Hunyo 16 diin mokabat sa 27 million ka mga estudyante ang nagpa-enroll gikan sa preschool hangtod sa senior high school.
