Giparubahan sa Department of Education (DepEd) ang upat (4) ka adlaw nga workweek alang sa mga non-teaching personnel nga motrabaho onsite matag semana sugod karong kagahapong adlawa, Marso 9, 2026.
Sumala sa memorandum nga gi-isyu ni Education Secretary Sonny Angara niadtong Marso 8, ang Biyernes itudlo isip standard work-from-home day para sa tanan nga nasakup sa polisiya.
Kini nagsunod sa direktiba ni Presidente Ferdinand Marcos Jr. nga ipatuman ang mga lakang sa pagdaginot sa enerhiya sa tanang opisina sa gobyerno tungod sa pagsaka sa presyo sa lana nga may kalabutan sa panagbangi sa Middle East.
Ang polisiya naglangkob sa mga non-teaching ug related-teaching personnel, lakip ang contract-of-service ug job order employees, samtang ang mga magtutudlo magpadayon sa ilang regular nga mga klase ug uban pang mga kalihokan.
Kauban sa upat ka adlaw nga onsite arrangement, ang DepEd nagmando usab sa mga lakang sa pagdaginot sa enerhiya aron makunhuran ang konsumo sa kuryente ug gasolina og 10% ngadto sa 20%.
Naglakip kini sa pag-set sa air conditioner ngadto sa 24°C, paggamit sa sleep mode sa mga kagamitan, pagpalong sa dili kinahanglan nga mga suga ug electronics sa opisina atol sa lunch breaks ug human sa trabaho, ug paggamit sa hagdanan imbes sa elevator.
Gimando usab sa DepEd nga ang mga miting, konsultasyon, ug mga komperensya sa mga ahensya ipahigayon sa mga virtual platform gawas kung gikinahanglan, ug ang mga opisyal nga pagbiyahe limitahan sa mga hinungdanon o kritikal nga mga katungdanan kung dili mahimo ang mga miting sa online.
